誰都喜歡你！

《叮噹》真係一套陪住我地長大嘅卡通片，縱使近年叮噹變左多拉A夢，靜兒，阿福，技安都改名了，但叮噹仍然係我地心目中嘅叮噹，係大雄永遠嘅好朋友！

有小朋友之後，成日都想比佢地接觸返自己小時候嘅卡通呀，玩具之類。可能想尋找返童年嘅快樂感覺。印象好深刻，呔仔2歲時第一次比佢睇叮噹，係一套叫《大雄的恐龍》嘅長篇故事。當睇到大雄同恐龍要分別時，呔仔哭了，係我地第一次見到呔仔咁感性。(剛又睇左一次，最尾我地3母子又係攬住喊)

《大雄的恐龍》

然後早兩年，到呔仔細細4，5歲時，我地曾經有段時間無比佢地睇叮噹，原因係我地發現呔仔睇完叮噹後，完全學左大雄嘅口吻語氣，成日會話自己無用，咩都做唔到等等比較負面嘅表達。我地就覺得，可能呔細都處於喜愛模仿嘅年紀，未識分辨對錯，所以我地停左叮噹一排，等佢地大個D先再睇。

又真係喎！前排開始睇返，佢地竟然有唔同嘅反應。呔仔會識得講話大雄咁樣唔啱，有時對媽媽無禮貌，又懶散，阿福就成日認叻，技安又成日蝦人等等，好似明白左好多野，識得分辨是非，我又放心比佢睇呢套卡通片喇。當然，佢地最鍾意睇嘅係叮噹每集唔同嘅法寶，呢個絕對啟發到佢地對不同事物嘅無限創意同聯想！真係「人人期望可達到」架，哈哈！而我自己最鍾意叮噹嘅每個故事入面，其實包含左好多友情同愛。佢地一班朋友雖然成日吵鬧，但一有事發生，一定出手相助，無論情況有幾壞幾危險，大家必定勇敢地攜手面對！每個長篇故事裡面嘅友情都令我非常感動！

響《大雄的秘密道具博物館》呢套長篇嘅結尾，叮噹多謝大雄幫佢搵返個叮噹嘅時候，佢話：「大雄你讀書唔得，運動又唔叻，樣樣野都易放棄，無一樣野係得架。但我覺得大雄你，你係一個好心地嘅人呀！」聽到呢段說話，我好動容。做人有咩野重要得過心地好? 缺點容易搵，但要一個幾好嘅朋友，先可以永遠包容自己嘅缺點，識欣賞自己嘅優點? 我為大雄有叮噹呢個朋友感到幸運！希望呔仔細細都可以搵到屬於自己嘅叮噹，永遠珍惜呢份咁珍貴嘅友情。

「叮噹先生，你會永遠響我地心入面！繼續陪住我地同埋我地嘅仔女長大架！再見喇！保重呀！」

《大雄的秘密道具博物館》