呔媽覺得呔仔唔鍾意打籃球就唔應該繼續,咁做唔單止浪費自己時間亦拖累成隊人。要落場,就要畀心機盡全力!

我哋成日都話: 年輕就是任性!其實除咗任性之外,年輕果種不知世態,果種不知天高地厚,正正就係令我地年輕時做出好多壯舉嘅原因。

 

曾經熱血的中學時代

那年12歲,一上中學我就知自己唔係讀書人,發現原來小學考的頭幾名,係因為考天才,其實冇點讀過書。上中學,真係要專心上堂、溫書,我就放棄了,是但唔留班就算。中學生涯最專心的係打羽毛球,閒時改歌詞寫小說。

 

入校隊幫學校打波,暑假日日返學校練波嘅日子,我覺得果種堅持同付出,其實同你專心讀書冇分別,只係大家投放嘅嘢唔同。

 

點解會憶起呢段往事呢,因為過去嘅星期,我第一次見大仔落場打籃球比賽,入咗校隊嘅佢為學校而戰,可惜,我見到佢完全冇比心機打,老實講都幾失望。失望唔係打得差,而係佢冇盡力!

 

事後,我哋同佢賽後檢討,發現可能係因為打得唔好,以致無甚動力。原因係其他隊友多數有打開波,控球射球已經有板有眼,而大仔只係近月先接觸籃球,擋人還OK,進攻仲未夠班。

呔媽專欄

 

 

以我想法,我覺得所有嘢都係訓練,當然有天份更好,但將勤補拙係成功之訣。一樣嘢你有興趣,然後瘋狂鍛練,一定成功的。但如果唔諗住盡力而為,不如唔好做,無謂浪費自己時間,又令教練同隊友失望。

 

痛恨兒子沒盡全力

再教佢,9歲仔喇,要開始對事情,特別是自己嘅選擇負責任!唔可以霸咗人哋一個籃球員位置,但你唔盡力打。

 

即使隊友眾多,但諗下你每一次出場,就係別人失去落場一次機會,有心打嘅隊友好珍惜每次落場機會的。我哋畀時間大仔諗清楚再決定係咪想留低,如果決定咗就要為自己盡力,改變心態。

 

一句說話成定局

其實我都打定輸數,覺得以佢性格,未必適合teamwork,可能游水果啲佢自己搞掂,仲有信心,因佢好怕同人交手,見佢打波冇殺氣嘅,斯文到呢,好似想讓晒啲波比人咁!但最後佢好肯定同我哋講,佢想繼續打喎!

 

我哋再三提醒佢,決定咗就唔好放棄,為自己嘅人生爭取一啲嘢,盡過力,無論結果係點都冇人怪你的。再回想,其實球場上出戰嘅大仔,都懷住幾大勇氣,諗番佢細個時完全唔鐘意畀人望,而家講緊全場教練,隊友,大批家長觀眾睇佢頭。

 

又令我諗番起當年初初出戰羽毛球,都慌慌地㗎!打單打,成敗一個人,雙打打得差又累街坊,你都咪話冇壓力,只係太年輕未識驚,心口掛個勇字,哈哈!

 

總之,人生道理就教了,希望佢可以堅持落去,愈打愈出色!

advertisement