35歲女怕做高齡產婦急生B 家有豬隊友恐變假單親迎來人生噩夢

對於結婚生仔，好多人都心裡有數，但生仔不是一個人的事，若另一半不分擔照顧，分分鐘變「假單親」，有老公似冇老公、有老竇似冇老竇。日前一位35歲女網友於討論區發言，指自己已屆「高齡產婦」的臨界點，與老公積極準備生B，但另一半沉迷打機、唔做家務，卻令她擔心不已。事主發帖之後，引來一陣網上熱議。

35歲怕做高齡產婦

該名港女於「香港討論區」以「想生仔，但覺得老公會是豬隊友」為題發帖，指老公比她更想有小朋友，「我係到呢一兩年因為再唔生就高齡，所以真係要做個決定……驚而家唔生，將來會後悔。」近半年與老公開始備孕，但由於老公是一名「豬隊友」，除了不做家務更終日沉迷打機，她擔心自己一旦決定生B，將會迎來淒慘的人生。

她指出，老公聲稱要減壓而經常打機，雖然她覺得打機沒有問題，她自己都會打，但覺得對方有時「過咗火」：「打到完全唔理身邊發生咩事......我唔一定要佢陪嘅，但有時係 online 同其他人對戰，係冇得pause嘅，咁你中途問佢嘢/有嘢要佢幫手/想喺電視前經過，其實都唔得，一定要等佢打完先，就算你要問佢/叫佢幫手嘅嘢係緊要事，你都冇辦法可以叫佢暫停......其實都幾影響到我......」

老公沉迷打機唔做家務 事主怕湊B唔返工失去話語權

現時事主雖然「公一份、婆一份」，不用養家的老公卻已有「撐起頭家」的心理壓力，如果她生B後，只能返part time甚至要辭工的話，未來生活令她難以想像：「因為搵到錢嗰個永遠講嘢都大聲啲，到時佢覺得自己一個人養全家辛苦過我，我又要靠佢養我嘅話，咁我都只可以硬食架啫......」而她亦曾向老公表示「一個人湊晒+做晒所有家務」，並講明不可只顧打機，得到的回應是「佢就拍心口話佢一定唔會咁樣，話一定會幫手湊仔同做家務。」，但事主只是半信半疑。

事主又指老公的行為沒有令她生氣，只是感到很失望，「我覺得佢唔適合做爸爸。好多嘢係見微知著。」很多事情雖然只是小事一樁，卻令事主覺得老公不適合做爸爸，「呢個人真係適合做爸爸咩？......或者令我覺得如果有咗小朋友，我會好無助好miserable......其實我而家呢個年紀，已經冇空間去嘥時間同猶豫，而且有時啲嘢都唔係話你想生就即刻有，但而家我真係唔知究竟仲試唔試好。」

豬隊友湊B誠意被質疑 網友一面倒反對事主生B

此事引來網民熱烈討論，有人留言表示：「講真，唔好生。生咗你要湊2件」、「唔生，你可能後悔；生咗，你必定後悔」、「畀我會唔敢生！佢連自己都照顧唔到，點照顧你哋」、「我自己打機都明白，嫁老公千其唔好揀個打機怪」、「同佢生仔搵自己笨啦，仲要照顧埋佢，到時BB出現只會令佢發更大脾氣」、「明白女性到咗某個年齡，會好想體驗同BB仔嘅親子關係。但豬隊友可以將媽媽逼到精神病，而細路仔喺咁嘅家庭環境成長未必幸福，生咗亦有機會令兩公婆感情惡化。考慮清楚，功德無量」，總括來說，網友都一面倒反對事主生B，勸她三思再作決定。

對於事主來說，她已經結婚，對方也理應是她挑選的終生伴侶，如果對方完全沒準備，或者完全不適合成為照顧BB的拍檔，事主是否應該一意孤行，決意要生育呢？是否生育下一代這話題，應該是決定結婚的時候已與另一半有共識，到了將成為高齡產婦這個臨界點才考慮是否生育，或許已經太遲。