呔媽專欄│用行動身教孩子：做人不能輕言放棄！

一直教小朋友，無論做任何事，唔可以未盡過力就放棄！自己細個經歷過，知道好多事情如果你錯過咗，冇好好把握機會，果刻可能覺得只係小事，因為年輕，仲有好多好多機會，仲有好多事情可以發生,但長大後，回望當初輕易放棄，冇為自己喜愛嘅事，為想實現嘅夢想盡過力，原來真係會後悔。

作為開通嘅媽媽，我唔可以幫兩個仔決定所有嘢，但當我發現佢哋鍾意一樣嘢，但唔夠動力，容易放棄嘅時候，我可以做嘅係推佢哋一把，拖住佢哋一齊行。

大仔今年參加咗學校籃球隊，由於剛開始接觸，比起其他校隊表現有段距離，打得唔太好，加上佢性格唔係進取型，好多時都想放棄。老公聽到佢咁講，有時會憫憎，叫佢以後唔好再打了，我哋都唔想浪費時間車佢去練波。男人總比女人缺乏耐性，所謂「恨鐵不成鋼」，打波果個都無心戀戰，大人難免心淡。

呔媽格言：唔可以未盡力就放棄！

阿仔冇動力，其實最需要嘅係父母支持同鼓勵，唔係同佢一齊放棄。可能我執着吧，未盡過力就放棄，我會後悔冇為小朋友努力過。結果我向一個打得超勁嘅隊友嘅媽咪請教，佢仔點解會打得咁好，除咗學校之外，仲可以去邊度練習。

呔媽專欄│用行動身教孩子：做人不能輕言放棄！

佢好好人，介紹咗我去佢教會一個籃球隊練習，仲係兩個仔可以一齊參加。之前細佬只能睇阿哥練習，因一般要3年級先可入隊，細佬 2 年級，而家逢星期五放學，兩個仔可以一齊去教會打波。我好開心呀，因為佢哋話好鍾意果度，有10幾個小朋友一齊練習，好好玩。

此事我又有感想，覺得其實小朋友容唔容易放棄，除咗睇佢本身性格，亦有好大原因係睇父母點樣身教，做個好榜樣。能夠比小朋友睇到我堅持，睇到我為佢哋盡力，其實好好，係一個好大嘅正面鼓勵！

我對小朋友嘅期望，並唔係要佢哋拿甚麼獎項，樣樣皆精。佢哋可以失敗，甚至零分包尾，但我希望過程當中，佢哋係有盡全力，就已無憾。

我覺得每個人都有軟弱嘅時候，都需要一個人帶你走出困局，會諗辦法救你嘅人，係天使。而我，希望成為兩個仔嘅天使，可以比我一直守護住，教佢哋做個堅強嘅人，唔好輕易放棄！